Читать книгу Умусликэн и его друзья онлайн
– Эда тыкэн гунденни: дюр hалгалкан! – Тэмбекан эвки элэксийрэ. – Ичэкэл, дыгин hалгачи эчэ! Таҥкал аямат, дыгин hалгачи эчэ! Минэвэ сомат урэчэ, эчэ, – тыкуливки Тэмбе.
Хутэкэн арай дюр ҥалэканми эмкэдук ювчэ, hалгакардии согинтудявки. Тар дюр ҥалэван ичэксэ, дюр hалганман ичэксэ, Тэмбекэн эhилэ дыгин hалгачи биhин, гунивки.
– Дыгин, дыгин hалгачи! – мэккусивки Тэмбе Агилканнюн.
– Моҥнон! – гунивки Агилкан. – Уhакан бинэ, hэгдыл гуннэвэтын эда эhинни долчатта? Дюр hалганин, дюр ҥалэн нуҥандун. Иhэвуксэ, тар-ты дюр ҥалэтпи вадиҥан синэвэ! Бэе ҥалэн бутуннувэ ситавки: бэрвэ-кэт дявучавки, бэйҥэвэ-кеивки. Эр-ты дюр ҥалэтпи, иhэвуксэ, бэркэнэи одиҥан, бэйҥэ дылван hогдиҥан! Бэеду дюр ҥалэн, дюр hалганин бивки. Эдягин-кат, би-кэ эhим мулана нуҥанман, – Агилкан гунивки.
– Колборвотын сигдэ улидеҥнэнни, – Сигачан гунэн. – Тарит тар синэвэ бэе эвки аявра, тарит синэвэ бэе бэичивки. Минэвэ бэе эвки илэчэрэ, би бэенюн аят бидеҥнэм.
– Би нян бэе hоктовон ҥэнэдеҥнэм эрэгэр, – Оли гунэн, – бултари бэе hолторонин минэвэ улидевки. Бэе ачин оракин, экун аян эмэдиҥэн?
– Тар-ты, тар-ты!– гивчэр гуниллэ. – Мунду – геванҥапты ороктово дегдывкил, саҥа орокто аят иhэвдэн. Бэлэчивкил мунду бэел. Бэе ачин оракин, эру бивки.
Тыкэн гунмэтчэнэл, адуладявкил баканава. Тар некэдерэктын, дэлэмичэн сачари Эҥни эмэрэн арай. Иендитпи эмэкэвэ илуhинэн, hуруврун. Укумнитпи укуврэн, бэеткэнмэ, тадук эмкучиллэн:
- Эйэгэн, эйэгэн! Акал hутэ!
- Эйэгэн, эйэген! Иhэвдекэл.
- Эйэгэн, эйэгэн! Куҥакан-hуркэн,
- Эйгэн, эйгэн, эвуники эhалкан,
- Эйэгэн, эйэгэн, ураҥкай hутэн!
- Эйэгэн, эйэген! аҥадякан-hутэ,
- Эйэгэн, эйэгэн, Тэмбе-баканан.
- Эйэгэн, эйэгэн, hэгды иhэвдиҥэс!
- Эйэгэг, эйэгэн, бэе-hуркэн одиҥас.
- Эйгэн, эйгэн, гэрбие ачин биhинни.
- Эйэгэн, эйэгэн, гэрбиес бакадиҥав.
- Эйэгэн, эйэгэн, синэвэ гэрбидиҥэв.
- Дыгин hалгаркар бакаҥатын,
- Дыгин hалгаркар бэйҥэл иргиҥэтын,
- Умусли Умусликэн гэрбис бигин!
Нэкучэн
Нимҥакан бими, таргачин бивки: дыгин hалгалкаhар бэйҥэл бакачал бэе hутэвэн, эhилэ иргидевкил. Дэлэмичэн сачари гэрбиен бучэ – Умусли Умусликэн мататкан оран.